للاسف مفيش ثورة

..................................

باسم الوطنية
و قبل منها باسم الله
و بين الاتنين فاصل كبير
حتى لا يقول حد هذا شرك
او دعوة غربية
وكمان باسم الشرعية
اللى ما شوفنا من وراها لقمة هنية
شعوبنا العربية
الكلمة هى هى
شبيحة و شلة حرامية
لقمة المواطن  عندهم زى اللقية
يبنى بيته ف أرضه يقولوا
يا سيد  تتعدى ع الأرض الزراعية ؟
يعملوا له محضر و شكية
والغرامة الكبيرة العفية
و الازالة الله عليها
يا سلام على الحنية
والمستشار اللى مالى الدنيا
لما يبنى الفيلا  على نفس الارض
و المساحة  و خارج الكردون
لا تسمع   ولا كلمة  الا أغنية
القضاء رمز الشرعية  والنزاهة
من غير بلطجية
و المحسوبية راح زمانها
هى دى الاغنية
و قمة الظرف لما يقول  شرعية
لقمة المواطن تقف ف حلقه
ولقمة القاضى هنية ؟
لما تروح مظلوم و تشكى
يقولوا قاطع طريق وابن حرامية
والظالم يقولوا عليه مظلوم
ومش صاحب أذية
طب والمدرس و الناظر و العسكرية
و الدوا الفاسد  و العلف الكاسد و التموين
دا مش من الشرعية
 لما تلاقى الدقيق مسوس للمواطن
وحلو للطبقة الغنية
 والسكر و الزيت ف السوق السودا
بين لصوص و شلة بلطجية
و اللى يسرح بتوكتوك يستر اهله
يطلع له اللى يضربه بدون اهمية
و اللى تنسرق ارضه  و يسرقوا منه القضية
دا مش من الشرعية
فين ياهل العدالة ياهل النزاهة
ياهل الدولة الابية
هى دى الثورة
والا مجرد احلام  وافكار سطحية ؟
و كل يوم يظهر لك باغنية
فين المعنى ؟
و فين الحرية ؟
للاسف
مافيش ثورة
مجرد لعبة للعيال
يسموها عسكر وحرامية
 وسلام الله على الدولة الوطنية .
...................................