ثورة على ورق زبدة

al3asema333@gmail.com
................................

قلنا زمان مافيش ثورة 
لا يناير ولا يونية و لا حتى كيلو بامية
بس هى طيبة زايدة حبة
نشوف الغش بعنينا و نقول دا مِية مِية
يكذب علينا البيه  نبرق له و   نصدق
يقول كلام فاضى و عكسه بيتحقق 
مش ممكن تبقى ثورة لما احنا نتهزأ
فواتير بندفع و المَية تقطع و التهم تتلفق
و النور من غير سؤال بيروح و ييجى يبقى ايه اللى متحقق
لو جيت للمبة جاز تولعها يا هناها ما بتصدق
تفرح لما تقيدها برقة و تلاقيها بترقرق
ايام جدودنا كانت حضارة بيها تتزوق
شوراعنا اللى ضلمة بيها كانت بتتلألأ
و الوقتى ابراج و عالية تتدمر وهى ما بتصدق
ترمى التهم يمين و شمال و ساعات بتتلزق
ولا تصلح عمود و فلوسنا فى ايديها تتفرق
و تقول لى ثورة
هوانتا بتصدق
لما ابنك يحب يذاكر  و لمبات البيت تتحرق
لما تفتح مكتبك تلاقى الضلمة عليك بتحلق
تتخبط ف كرسى و دمك يبقى سابقك
يجى المحصل من غير قراية بعد شهور يقولك
فين برايزك و بيك بيمهزأ
يا للى ما شفتك اوعاك تصدق
الثورة كلمة فى الكتاب و بس
و فى الحياة اللى ما يعرف يقول عدس
الثورة فى الحقيقة وحدة للصف
لا فلول بترجع و لا ناس بتلف
و لا كلمة فارغة ولا جلبية بتشف
و لا ضحكة بايخة على اللسان بترف
و لا فيلم ماسخ ولا سيما بتسف
ولا شرطة تاقصة للسجون بتزف
ولا بلطجى عايش فى هنا على الناس يتف
هى فين الثورة يا ناس بجد
لما الشهيد يروح حقه هدر  و المجرم  ينتصر
و اللى ينهب البلاد يسافر يصرفها ع البقر
خفوا علينا شوية دى الحجار بتنكسر
خفوا علينا والا احنا مش بشر
لما عنينا تطلع ف زرع الارض و يروح منها النظر
تلاقى المية مالحة و الزرع يبقى ف خطر
تلاقى الخضرة دبلانة مليانة بالضرر
لما تلاقى القبور رخام و الفقير يعيش تحت المطر
لما تلاقى الاكل بمليون يترمى و ناس مش عارفة تتستر
هى دى الثورة يا بشر ؟
يجيلك ع القناة اللى تتحفر
فين ضمان الناس من الخطر
صك بخمسمية دا كان زمان و جبر
بعد خمس سنين يبقوا كام ياللى عندك نظر ؟
طب انا ف الشركة دى بصكى ولا كلام  غجر
هى فين الثورة دية والا احنا مش بشر ...
...........................................................
أحمد المليجى - رحلة وطن