رومانسية :
..............................
باحلم بيك وكأنك الزوجة الوفية
يا بلد ياللى طول عمرك عفية
هويتك ولو إن احلامى غبية
صبرك وقود يحيى كل أمنية
صبرك حياة لكل كلمة عربية
مصر يا أحلى من كل أغنية
كنت ساخط عليك لما يقطعوا المية
كنت ساخط عليك لما النور يفوت عنية
لكن ارجع واعترف لك بخيبتى القوية
ارجع وأقول احلامى ليه أنانية ؟
واندم على القولة والحكاية اللى مش
هية
بلدى يا أحلى من اى كلمة رومانسية
كل يوم بنادى و جوايا صرخة عالية
كل يوم يزيد عذابى لما ألاقى حيرتك هية هية
لما القى صرختك مالية الدنيا رغم إن فيك حنية
لم يرجع الجندى قتيل من عصابة مفترية
اسأل نفسى وأقول ليه تبقى هية ؟
اللى متخانة وبالمصايب متعبية ؟
ياللى اغلى من الحياة يا ضحكة ف الصبحية
ليه يقولوا عليك ليه يعلنوا القسية
ليه الولاد يتفرقوا بين اسلام وعلمانية
ياللى للكل غنوة فى القلوب ندية
ليه يصبح من ولادك بلطجية ؟
ليه تدمع عيونك ياللى ف عيونى دماء زكية
ليه تبقى فيك الشماتة وانت الحرة الأبية
عيون حقودة وبيقول وفية
يحسسك بكلمة دافية
انه مش بتاع أذية
وعيونه كله شرر و مفترية
بلدى ياللى كلك إنسانية
كفاياك دمع و حزن يا ما كنت متعبية
ناديتك من جوا روحى بالفدا
تمنيت انى أفديك من كل العدى
مش بس لكونك صعبانة علية
لا لانى منك
واللى بيك يبقى بية
هواك يملى روحى بالوفا و الرضا
هواك يملى قلبى عطر وشذا
يفيض على الدنيا ويملا الفضا
كلامك يحيى القلوب و يشفيها
و ينجيها من اللى كان فيها
غالية على يا بلدى
مش كتير عليك حب
ولا كتير عليك الهوى
ولا كتيرة عليك الرومانسية ....
بحبك كلمة فى روحى ليها أغنية
بحبك كلمة نبرتها قوية.....
( أحمد المليجى )
1 /8/2013
.(من ديوان: رحلة وطن )
ليست هناك تعليقات:
إرسال تعليق